Zuri-Baltza xake taldeak, Bilboko Konpartsakekin elkarlanean, ia bi hamarkada darama Bilboko jaietan xake-jarduerak antolatzen.

Elkarlan horren lehen pausoak 1997 urtean eman genituen, asteazkenez, Bilboko jaietako xake-jarduerak lehen aldiz antolatu genituenean. Hurrengo urtean, egungo eredua ezarri genuen: xake-jarduera ezberdinak astegunetan, eta nazioarteko txapelketa asteburuan. Aipatutako lehendabiziko nazioarteko txapelketa Esperanza frontoian eratu genuen, 1998 urtean, eta Bizkaiko txapelketa zirkuituaren hasiera izan zen.

Aste Nagusian, gure xede bakarra honakoa da: xakea kalera atera eta festa giroko gune herrikoia sortzea, hala xakean jokatzen ikasi nahi dutenentzat nola zenbait urteren ostean xake-mundura itzuli nahi dutenentzat.

Xake-jaialdi honek, Bizkaian sei egunetan jarraian burutzen den bakarrak, jende oso anitza batzen du. Adineko jokalariek euren iloba txikiekin aritzen dira; “gaupasa” egindako gazteek, berriz, partidak jokatu eta gosaldu, dena aldi berean egiten dute.

Lagunarteko partidak jokatzeko espazioaz gain, egun bakoitzean jarduera/erakustaldi ezberdina antolatzen dugu: aldi bereko partidak, Fisher Random Chess modalitatekoak, itsukako norgehiagokak, anti-xakea, partida azkarreko txapelketa, Anaitasunaren zirkuitoa eta arestian aipatutako nazioarteko txapelketa, zeinak opari-sariak banatzen baititu, partaideen arteko harreman ona sustatzeko asmoz.